Chili con carne

Lýsing

Chili Con Carne á rætur sínar að rekja til Ameríku og má finna fyrstu rituðu heimildir um réttinn í skrifum frá 16. öld. Í sinni einföldustu mynd er rétturinn kássa með piprum og kjöti og má endalaust deila um hvaða hráefni fylgja þessum grunnstoðum réttarins. Það sem hér fylgir er góður og sveigjanlegur grunnur sem hæglega getur staðið sjálfstætt. Verið algjörlega óhrædd við að skipta út hráefnunum hér fyrir neðan og notið það sem er fyrir hendi.

Ég elda alltaf nóg af þessum rétt því hann er æðislegur í afganga. Rétturinn er ekki lengi í undirbúning og fer mestur tími í að leyfa honum að malla.

Hráefni

Þessi uppskrift er miðuð við 1 kg. af hökkuðu kjöti. Ég nota oftast nautakjöt.

Grænmeti

Þessi útgáfa notar papríkur til að stýra hitastiginu. Rétturinn byggir á blöndu af gulrótum, lauk og sellerí, en þessi blanda heitir m.a. mirepoix eða soffrito og er undirstaða fjölmargra rétta frá mörgum matarmenningum. Ef gulrótunum væri skipt út fyrir papríku værum við komin með það sem í Cajun-matargerð kallast hin heilaga þrenning og mætti því segja að hér sé einhverskonar samspil að eiga sér stað. En aftur, ekki hika við að skipta hráefnunum út.

Krydd og bragðbætir

Papríka og broddkúmen mynda kryddgrunninn. Það er nokkuð ólíklegt að magnið sem hér fylgir sé nákvæmlega það sem þið þurfið til að fá góðar niðurstöður og er því mikilvægt að smakka réttinn til. Hægt er að bæta við hinu og þessu í réttinn til að draga fram nýtt bragð og má þar sem dæmi nefna kanilstangir, súkkulaði eða kaffi.

Bragðgóður vökvi er notaður til að hreinsa það sem er farið að bakast við botninn á pottinum. Þar leynist ótrúlega mikið bragð og væri synd að láta það fara til spillis. Vökvi þessi getur verið soð, vatn, vín (ég nota gjarnan rauðvín), bjór, gos eða hvað sem ykkur dettur í hug og eigið til. Stundum nota ég sósu sem er búin til úr þurrkuðum chili piprum (ancho og guajillo) sem hafa verið lagðir í bleyti í heitu soði og svo maukaðir í blandara.

Aðferð

1. Skerið niður grænmetið. Hér má stytta sér leið og nota matvinnsluvél, en mismunandi skurður á grænmetinu getur gefið honum nýja mynd og er gaman að prófa sig áfram með það. Mín reynsla er sú að bestar niðurstöður má fá með því að skera grænmetið eins, óháð því hversu fínt og gróft það er.
2. Steikið grænmetið á miðlungs hita í stórum pott þar til laukurinn er farinn að mýkjast og næstum orðinn glær. Hrærið því næst kjötinu við og haldið áfram að steikja þar til það er farið að taka á sig lit.
3. Steikið tómatpúrruna þar til hún fer að dökkna, ~1 - 2 mínútur. Hellið bragðgóða vökvanum út í og hrærið vel á sama tíma og þið passið að skrapa vel upp úr botninum. Hellið því næst niðursoðnu tómötunum út í.
4. Leyfið þessu öllu að malla í 1 – 2 tíma og passið að hræra reglulega. Ef nægur tími er til stefnu má einfalda hlutina með því að setja pottinn í bakarofn á 150°C í 2 – 4 tíma, en þá þarf ekki að hræra eins mikið ég myndi jafnvel ganga svo langt og segja að rétturinn verði bragðbetri með þessari aðferð.
5. Smakkið til með kryddunum / bragðbætunum hér fyrir ofan. Ekki hika við að vera ævintýragjörn.
6. Berið fram réttinn með sýrðum rjóma, rifnum ost og nachos.